الجمعة، 9 مايو 2008

لو كان عندى إيميل !!!


النهاردة هقولكوا على قصة صغنتوتة كده بس ليها معنى كبير أوى وبعيييييد أوى, مش عارف هتعجبكم ولا لأ وهعرف من الردود إن شاء الله

قامت شركة كبيرة -MultiNational- بتقديم مجموعة من الوظائف الخالية للمتقدمين وتم تحديد ميعاد المقابلات لجميع المتقدمين للوظائف المختلفة ...
ذهب جميع المتقدمين للشركة ، كان من ضمن الوظائف المتاحة : وظيفة عامل نظافة فى الشركة
كان أحد المتقدمين لهذه الوظيفة أحد الشباب الذين يئسوا من البحث وعدم إيجاد أى وظيفة ومع أنه يحمل مؤهل ولكنه كان ليرضى بأقل الوظائف المتاحة لكيلا يصبح من العاطلين...
وفى يوم المقابلة تم إعطاء جميع المتقدمين Application ليقوم كل واحد منهم بملأ بياناته . قام الجميع ومنهم هذا الشخص بملأ بياناتهم وعند تسليم الـ Application للمسئول تفقدهم وفوجئ بأن هذا الرجل لم يملأ خانة البريد الإلكترونى ( الإيميل ) فقال له لماذا لم تملأ مكان البريد الإلكترونى ؟؟ فقال له أنا لا أملك بريد إلكترونى
ذهل المسئول وقال له باستهزاء : إنت عارف إنك جاى تقدم فى شركة زى دى ومعندكش إيميل ؟ طب إزاى ؟ وانصرف الرجل من الشركة فاقداً الأمل فى هذه الوظيفة...
مرت الأيام وبدأ الرجل فى شق طريقه فى الحياة بأحد المشروعات الصغيرة جداً وكبر المشروع حتى أصبح عظيماً جداً وأصبح الرجل من الأثرياء...
فى أحد الأيام شاهد الرجل أحد الإعلانات على التليفزيون وكان يريد أن يشترى منتج معين أعجبه وأراد الحصول عليه
اتصل على الرقم فرد عليه شخص واتفق معه على التفاصيل ، وعندما بدأ يأخذ منه البيانات سأله على الإسم والعنوان وهكذا ... وحينما سأله على الإيميل ... قال له لا أملك إيميل فقال له الرجل : هو فى حد دلوقتى معندوش إيميل؟
فابتسم الرجل وقال له :
"إنت عارف لو عندى إيميل كان زمانى شغال إيه ؟!!!!!! "
ياريت كل واحد يرد عليا يقول لى القصة دى بتمثل له إيه وشايف إيه من وراها ولو مش شايف أى حاجة برده يعرفنى


KYAH

الخميس، 8 مايو 2008

أقوال مأثورة

أقوال مأثورة

إزيكم ، كنت عايز أسرد لكم (حلوة أسرد دى صح ؟ ) شوية أقوال مأثورة ومين اللى قال كل واحد فيهم ...طبعاً كل اللى قرأ أول سطر ده قااال يادى النيلة وحس إنى هعيد وأزيد فى كلام كل الناس عارفاه من أصغر طفل لأكبر المعمرين على أرض المعمورة !!!
لأ بجد أنا مش هقول كلام حافظينوا وكلنا فخورين بيه وفضلنا فخورين بيه لحد ما وصل بينا الحال إنه يتقال علينا حضارة سبع تلاف سنة ووقفنا عند الكلمة دى، أياً كان المهم خلينا فى الأقوال المأثورة ... إليكم التفاصيل:
  1. "خد منديل يابنى / لو سمحت يابنى ساعدنى ربنا يديلك" : واللى بيقول كده عدد ليس بقليل من أناس يعملون "بشرف" فى مهنة الشحاتة المقننة والتى لا يحاسب عليها القانون (مع عدم الأخذ فى الإعتبار بصحة أو عدم صحة حال القائل). وتقال تلك الكلمة على الأقل مرتين رايح جاى يومياً.

  2. "ماهى العربية فاضية أهى ، اتحرك يا أخينا شوية": بيقول كده كل كمثرى فى الأوتوبيس أو تبــاع فى عربية سيرفيس وفى الحالتين العربية بتبقى على آخرها وهو واثق إن العربية ممكن تشيل أكتر.

  3. "اللى عندهم دم ماتوا": بتقول الجملة دى كل واحدة ولا مؤاخذة ست طالعة أوتوبيس أو راكبة عربية الرجالة فى المترو مش السيدات اللى بتبقى فاضية ، عشان تتأكد إن الناس أول ما هيشوفوها - وأكيد الرجالة - هيقفوا على طول ولا العسكرى اللى بيدى التحية لظابط ، والكلام ده ساعات بيبقى منطوق وساعات غير منطوق.

  4. "اتكلم من القلب" ، "ماتفوتش لحظة": بيقول الجملتين دول كلاً من الشبكتين المبجلتين موبينيل وفودافون وهيفضلوا يقولوها لحد ما الناس كلها تموت.

  5. "ليه بنحبك يا ريس": قالها الأستاذ الكبير ممتاز القط رئيس دار أخبار اليوم أو حاجة زى كده المهم ... بدون تعليق.

  6. "مقتل عشرات الفلسطينيين فى غارة للقوات الإسرائيليى على غزة، ارتفاع أعداد ضحايا الإنفجار الذى هز مدينة بغداد إلى أكثر من 100 عراقى": الكلام اللى بالشكل ده بقى طبيعى جداً ومش جديد وبقى أحد الأقوال المأثورة اللى مالية الجرايد ونشرات التليفزيون ولا اللى بيقول نكت.

  7. "إن شاء الله ويإذن الله وبعون الله هنكسب فى تصفيات كأس العالم ونصعد عشان ماوصلناش لكأس العالم من سنة 1990 فى إيطاليا": هتفضل جماهير الكورة ولامؤاخذة تحلم لحد يوم الدين بصعود مصر لكأس العالم وهما مش حاسين إننا كده كده هيبقى معانا فى المجموعة يالكاميرون ياتونس ياكوتديفوار ياغانا وكلهم بيمثلوا عقدة بالنسبالنا فى الصعود لكأس العالم ... وإن شاء الله هنصعد بس لو شالوا الفرق دى من أفريقيا وجابوا ناس مش عاملة عقدة للمصريين زى منتخبات فرنسا وهولندا وموزمبيق و الرأس الأخضر.

  8. "الأهلى يفوز ويعتلى قمة الدورى المصرى بلا مجهود": والمجهود كله على عاتق اتحاد الكورة والحكام , ويبقى الشعار : إلعب للأهلى ، تلعب وحش ، تكسب كتير ، تلاقى الحكام مظبطاك والجماهير بتهتفلك.

  9. "الزمالك يواصل سلسلة الهزائم": بيفكرونى بسلسلة "شرارة" اللى كانت عاملة عقدة برده , ومن أخبار اليوم نجد إقالة الجهاز الفنى للزمالك عشان المدير الفنى طلع قلبه جامد وبيضرب اللعيبة لما بيلعبوا بالكورة من غير ما يحطوا كالونيا وبيقولهم كخ ، وماما مش معوداهم على الضرب.

  10. "يا عم هو احنا قدهم ؟ خلينا فى حالنا": بيقول العبارة دى كل إنسان ينطق باللغة العربية أياً كانوا اللى احنا مش قدهم , بس أهم ما فى الجملة إنها فعلاً وحدت لسان العرب.

وأخــــيراً بعض الأقوال الفنية المأثورة اللى بتعجبنى :
"حسبى الله ونعم الوكيل، الحاج صاحب البيت..." : من فيلم جاءنا البيان التالى
"إنت جاى تعزى ولا جاى تهرج ؟ أنا جاى أهرج...": يحيى الفخرانى من فيلم الكيف
"أنا بس عايز أعرف: هو القرد لسة بيتنطط ولا بطل تنطيط ؟؟": محمود عبد العزيز من فيلم له مع نور الشريف وحسين فهمى مش فاكر إسمه
"أنا حسحس و حسحس أنا...": محمود حميدة من فيلم مش فاكر إسمه
"أنا خالى اللى بيأكلهم....": عادل إمام من مسرحية الواد سيد الشغال
"لا هو إنت بتسمعنا سكاتك يا ولا ؟؟": محمد صبحى من مسرحية وجهة نظر
"اللى راح راح خلاص...": محمد صبحى من مسرحية ماما أمريكا
KYAH

الثلاثاء، 6 مايو 2008

أهلاً بأى حد فى المسخرة دى

سلام عليكم
أول حاجة أحب أقول إن دى أول رسالة على البلوج ده وإن شاء الله هتابع معاكم على طول وهنقول كلام كله ولا مؤاخذة مسخرة
 هو مش مسخرة بالمعنى الرسمى يعنى بس هو شوية حاجات حصلت وبتحصل تقدر تفسر من مغزاها إنها مجرد مسخرة ولسة ياما هنشوف
أسيبكم دلوقتى وأكمل بعدين لو كان فى العمر
بقية
C U sooooooooooon
KYAH